Sir Alex Ferguson është gati të bëjë një rikthim të shumëpritur në pankinë për ndeshjen lamtumirëse të Giuseppe Rossi-t, pasi më parë kishte pranuar se një ndeshje e veçantë e bëri të ndjejë mungesën e menaxhimit.
Ish-trajneri legjendar i Manchester United, i cili fitoi 13 tituj të Premier League para se të tërhiqej në vitin 2013, vazhdon të ketë një ndikim të madh në botën e futbollit.
Ai u rikthye në pankinën e Old Trafford në vitin 2019, kur një ekip i yjeve të Manchester United u përball me Bayern Munich në një ndeshje për të shënuar 20-vjetorin e tripletës historike.
Tani, 83-vjeçari duket se do të drejtojë një tjetër ndeshje, sipas ish-sulmuesit Giuseppe Rossi, i cili ka konfirmuar se Ferguson do të jetë i pranishëm në ndeshjen e tij lamtumirëse në Firence më 22 mars.
Biseda mes Rossi-t dhe Ferguson-it
Giuseppe Rossi, i cili debutoi për Manchester United në një ndeshje të Kupës së Ligës kundër Crystal Palace në nëntor të 2004, ka zbuluar bisedën që pati me skocezin legjendar.
“Ferguson do të jetë aty si trajner,” tha Rossi, sipas The Sun. “Ai ishte trajneri im i parë, unë nënshkrova me United kur isha 17 vjeç. Qëndrova vetëm tre vite me të dhe nuk luajta shumë, por ai menjëherë tha ‘po’ për këtë ndeshje, dhe kjo tregon se çfarë njeriu është.”
“Unë bëra shumë pak te United, por ai më trajton si Cristiano Ronaldo, i cili ka shënuar 1000 gola.”, shtoi ai.
Në këtë ndeshje speciale, Ferguson do të drejtojë një ekip në Stadio Franchi, ku pritet të marrin pjesë edhe yje të tjerë të futbollit si Gabriel Batistuta, Luca Toni dhe Antonio Cassano..
Ndeshja që i kujtoi Ferguson-it pasionin për menaxhimin
Ky rikthim i Ferguson-it në pankinë vjen vetëm katër muaj pasi ai zbuloi ndeshjen që i kujtoi sa shumë i mungonte të ishte trajner.
Duke folur për BBC Breakfast, ai pranoi se finalja e Champions League 2014, midis Real Madrid dhe Atletico Madrid, e bëri të ndjente nostalgji për netët e mëdha evropiane.
“Jam i tërhequr tashmë 11 vjet, kështu që duhet të përshtatesh,” tha ai. “Më mungon ndonjëherë. Mendoj se në vitin e parë pas pensionimit, shkova në finalen e Champions League dhe i thashë Cathy-t (bashkëshortes së tij): ‘Kjo është ajo që më mungon. Ndeshjet e mëdha, ndeshjet evropiane.’”
“Shkoj në shumicën e finaleve evropiane sepse ndjej se kam një lidhje me to. Do të doja ta bëja këtë çdo ditë. Këto janë ngjarjet e mëdha ku një klub si United duhet të jetë gjithmonë i përfshirë”, shtoi ai.
Gjatë karrierës së tij të shkëlqyer, Sir Alex Ferguson drejtoi Manchester United në katër finale të Champions League, duke fituar trofeun në 1999 dhe 2008, por duke humbur kundër Barcelona-s së Pep Guardiola-s në 2009 dhe 2011.
Rikthimi i tij në pankinë për ndeshjen e Giuseppe Rossi-t do të jetë një moment i veçantë për tifozët e futbollit dhe për ata që ende e mbajnë mend si një nga trajnerët më të mëdhenj në histori./Express
Sir Alex Ferguson ndihet i emocionuar pasi do të drejtojë ndeshjen lamtumirëse të Giuseppe Rossit / shkruan Gazeta Online Reporteri.net.
