I dështuari në Manchester United është dashur ta fitonte Topin e Artë, por suspendimi prej katër vjetësh për doping, do të thotë se ai do të mbahet mend si njëri prej rrëfimeve më të trishta në historinë e futbollit.
Mesfushori Paul Pogba ka mundur të jetë më i madhi i të gjitha kohëve, por njërin vendim pas tjetrit, secilin më të keq, dhe kulmoi me dështimin në testet për doping, vlerëson faqja Goal.com në një analizë pas vendimit për suspendimin e francezit.
Në filmin e shkëlqyer të Robert De Niros “A Bronx Tale”, protagonisti riosh i tij, Calogero ‘C’ Anello, e merr vesh se “gjëja më e trishtueshme në jetë është talenti i çuar poshtë dhe vendimet që merrni, të cilat i japin formë jetës suaj përgjithmonë”, përcjell gazeta online Reporteri.net.
Paul Pogba është rasti i përkryer për këtë. Ai dikur ishte lojtari më i shtrenjtë në planet. Është dashur të bëhet edhe më i miri. Ikona e Italisë, Gianluigi Buffon kishte thënë se ai i linte gojëhapur me fizikun dhe teknikën e tij, teksa Ronaldinho kishte parashikuar se Pogba do të fitonte Topin e Artë.
Pra, kur francezi u kthye në Manchester United në vitin 2016, “Teatri i ëndrrave” ia ofroi mundësinë që të realizonte krejt këto parashikime. Mirëpo tani duket se Pogba është i mbaruar për nivelin më të lartë. Viktimë e vendimmarrjeve të tij të këqija.
Në fakt, pasi karriera e tij u shpenzua nga lëndimet dhe mungesa e disiplinës, me shumë gjasë kurrë nuk do të kthehet në rrugën e duhur pas suspendimit prej katër vjetësh.
Fundi i hidhur
Një prej lojtarëve më të talentuar mund të mos luajë më kurrë futboll elitar – edhe nëse ia del, kurrë nuk do t’i afrohet nivelit që kishte në vitet e hershme te Juventusi ose me përfaqësuesen e Francës.
Në verën e vitit 2022, Juventusi ishte shprehur e kënaqur se ia doli të transferonte Pogban nga Unitedi si lojtar i lirë për herën e dytë. Mesfushori shfrytëzoi mundësinë për t’ia nisur nga e para. Në realitet, ishte fillimi i fundit të hidhur të periudhës së tij në futbollin elitar.
Pogba vazhdoi të kishte probleme me lëndimet. Dhe gjëja më e rëndë ishte se të gjithë mendonin se ai ishte fajtori. Në përpjekje të madhe për të luajtur me Francën në Botërorin 2022, ai vendosi kundër ndërhyrjes kirurgjike në gju. Ky qe vendimi më katastrofal i mundshëm sepse “terapia e rëndë” nuk bëri asgjë veçse ia shtyri operimin dhe kohën e rikuperimit.
Edhe vetëm për këtë arsye, nuk ka asnjë shans që Pogba të harrohet, sepse ai tani e ka të shkruar që të mbahet mend si një nga historitë më të trishta të lojës, një tregim paralajmërues i efekteve të zgjedhjeve të këqija të jetës: Fituesi i Kupës së Botës dhe talenti i çuar dëm.
Pogba – talenti i çuar dëm / shkruan Gazeta Online Reporteri.net.
