Anglia do të jetë në kërkim të historisë të dielën kur të përballet me Spanjën në finalen e Evropianit në Berlin.
Gareth Southgate ka udhëhequr ekipin e tij në dy finale radhazi të Kampionatit Evropian dhe në finalen e parë të madhe të turneut për burra në tokë të huaj.
Spanja ka qenë argëtuesja më e madhe në Gjermani për shkak të lojës së bukur, ndërsa Anglia ka treguar vendosmëri dhe këmbëngulje teksa është përmirësuar vazhdimisht për të arritur në finale.
BBC Sport ka analizuar pesë beteja kyçe që mund të vendosin se kush do të ngrejë trofeun të dielën.
Foden kundër Rodrit
Mesfusha ka të ngjarë të jetë vendimtare në finale, me talentet yje me bollëk. Southgate ka gjetur një mënyrë për të vendosur Lojtarin e Sezonit të Premier League Phil Foden dhe Lojtarin e Sezonit të La Ligës Jude Bellingham në role qendrore dhe sulmuese – dhe të dy mund të jenë kyç për rezultat të mirë ndaj Spanjës. Foden ishte i shkëlqyer kundër Holandës dhe ishte fatkeq që nuk e kurorëzoi performancën me një gol, dhe ndërsa Bellingham ka luftuar herë pas here, ai është i aftë të shfaqë momente magjike, përcjell gazeta online Reporteri.net.
Përballë tyre do të jetë mesfushori mbrojtës i Manchester Cityt, Rodri – i cili ka humbur vetëm një nga 79 ndeshjet e fundit për klubin dhe përfaqësuesen. Foden e di shumë mirë sa i mirë është Rodri për shkak se të dy luajnë te City, por kjo mund të jetë gjithashtu përparësi për Southgate kur të kuptojë se si ta menaxhojë atë. 28-vjeçari, i cili ka lindur në ditën kur Anglia eliminoi Spanjën nga Euro ’96, konsiderohet gjerësisht si lojtari më i mirë në botë në pozicionin e tij. Siç është për Cityn, ai është motori i ekipit të Spanjës dhe ka diktuar lojën nga mesfusha – duke krijuar pesë mundësi, një asistim dhe duke rikuperuar topin 31 herë.
Yamal kundër Shaw
Para këtij turneu, kishte shumë fjalë për një yll të ardhshëm në radhët e Barcelonës – anësorin 16-vjeçar Lamine Yamal. Por në Euro 2024, adoleshenti – i cili mbush 17 vjeç një ditë para finales – ka hyrë me të vërtetë në skenën botërore, duke u bërë lojtari më i ri që nis një ndeshje të Kampionatit Evropian në ndeshjen e Spanjës kundër Kroacisë. Goli i tij në gjysmëfinale e bëri atë golashënuesin më të ri në një Evropian apo Kupë Bote, duke thyer rekordin e Peles. Ai gjithashtu theu rekordin e Peles duke u bërë lojtari më i ri në një gjysmëfinale në të dy turnetë. Ai ka dhënë tre asistime dhe ka krijuar 13 mundësi, duke shkaktuar kaos në krahun e djathtë ndërsa Nico Williams bën të njëjtën gjë në të majtë.
Nëse Anglia do të ketë një shans për të fituar, ata do të duhet të përballen me kërcënimin e Spanjës në krahë. Kieran Trippier është preferuar në anën e majtë të mbrojtjes gjatë gjithë turneut, por ai është në dyshim shkaku i një lëndimi kur u zëvendësua nga Luke Shaw në pushimin e pjesës së parë në gjysmëfinalen kundër Holandës.
Southgate konfirmoi se ishte vetëm masë paraprake, por Shaw ka treguar mprehtësi kur ka hyrë në lojë dhe nuk ka qenë si dikush që ka kaluar katër muaj jashtë si i lënduar. Si mbrojtësi i vetëm natyral i majtë i Anglisë, finalja mund të jetë koha për t’i dhënë Shaw një mundësi nga fillimi. Ai shënoi pas vetëm dy minutash në finalen e Euro 2020 kundër Italisë, kështu që ka qenë aty dhe e ka bërë atë në një rast të madh.
Cucurella kundër Sakas
Për të dy Marc Cucurella dhe Bukayo Saka, Euro 2024 ka qenë tregim suksesi. Vetëm gjashtë muaj më parë, mbrojtësi i majtë i Chelseat, Cucurella, po vërshëllehej nga tifozët e tij, pasi kishte luftuar për të lënë përshtypje pas një transferimi prej 63 milionë funtes nga Brighton në 2022.
Por 25-vjeçari ishte në zemër të ngritjes së papritur të Chelseat për një vend në Evropë dhe ka vazhduar atë formë në Euro 2024. Ai ka filluar pesë nga gjashtë ndeshjet e Spanjës, pasi kishte fituar vetëm katër ndeshje para turneut, dhe ka krijuar një partneritet të shkëlqyer me Williams në anën e majtë të Spanjës.
Për Sakan – pas zhgënjimit të humbjes së një penalltie në finalen e Euro 2020 dhe abuzimit të tmerrshëm racor që përjetoi pastaj – Euro 2024 ka theksuar qëndrueshmërinë e tij. 22-vjeçari ka qenë kërcënim i vazhdueshëm, duke realizuar një gol të shkëlqyer kundër Zvicrës në çerekfinale përpara se të realizonte penalltinë e tij në gjuajtjen e penalltive.
Olmo kundër Rice
Declan Rice ka luajtur çdo minutë të Euro 2024 për Anglinë dhe ka mbuluar më shumë distancë se çdo lojtar tjetër me 74.91 km. Mesfushori i Arsenalit ka pasur më shumë se 300 prekje dhe 236 pasime të kompletuara ndërsa ka qenë nën presion – më shumë se çdo lojtar tjetër në turne.
Ai gjithashtu ka bërë shtatë pasime që kanë çuar në një gjuajtje dhe, në mënyrë mbrojtëse, është në krye me francezin Jules Kounde për topa të rikuperuar me 41. Rice do të kërkojë të dominojë mesfushën për të parandaluar mesfushorin e RB Leipzig, Dani Olmo, që të shtojë numrin e tij prej tre golash, të cilat i ka akumuluar pavarësisht se ka filluar vetëm dy ndeshje.
Olmo është në të njëjtin nivel me katër lojtarë të tjerë për gola, por dy asistimet e tij do të thotë se ai udhëheq garën për Këpucën e Artë. Në mungesë të Pedrit, i cili pësoi një dëmtim që e largoi nga turneu kundër Gjermanisë në çerekfinale, Olmo ka rritur nivelin dhe interesi për 26-vjeçarin nga klubet në Evropë është rritur.
Williams kundër Walker
Stili argëtues i Spanjës në këtë turne është kryesisht falë anësorëve të tyre dinamikë – Yamal dhe Williams. Anësori i Athletic Bilbao, Williams, 21 vjeç, ka bërë përshtypje në anën e majtë me driblimet e tij dhe aftësinë për të sulmuar mbrojtjet.
Ai dhe Yamal janë bërë miq të ngushtë dhe të dy festojnë ditëlindjet dy ditë para finales. Southgate me siguri do të mbështetet tek mbrojtësi i besuar Kyle Walker për të parandaluar çdo festim të përbashkët të ditëlindjes/fitores së futbollistëve spanjollë të dielën.
Walker është 13 vjet më i madh se Williams, por mbrojtësi i shpejtë është një nga të paktët mbrojtës në Evropë që mund të pretendojë se mund të përballojë shpejtësinë e sulmuesit francez Kylian Mbappe dhe brazilianit Vinicius Jr. Mbrojtësi i Manchester Cityt, një nga katër lojtarët e Anglisë që kanë luajtur çdo minutë të Evropianit deri më tani, shkëlqen në përballjet një për një dhe do të duhet të përdorë shpejtësinë e tij për të mbajtur hapin me Williams të dielën.
Pesë betejat kyçe të finales së Evropianit / shkruan Gazeta Online Reporteri.net.
