Kosova e ka nisur me fitore parakualifikimet në Botëror, duke mposhtur Irlandën me rezultat 83:76.
Dardanët e nisën ndeshjen më mirë dhe për një nuancë ishin më të mirë në çerekun e parë, duke e fituar këtë pjesë 22:17. Periudha e dytë ishte më e barabartë, por vendasit ruajtën epërsinë dhe shkuan në pushim me rezultat 45:38.
Ngjashëm ishte perioda e tretë, që ishte e barabartë, duke përfunduar 20:19, derisa shifrat pas 30 minutash ishin 65:57. Por, irlandezët nuk u dorëzuan dhe për tre minuta në çerekun e fundit me një seri prej 0:8, barazuan shifrat në 65:65. Megjithatë, në minutat e fundit, Dardanët u shkëputën dhe triumfuan 83:76.
Te Kosova u dalluan Drilon Hajrizi me 20 pikë e nëntë kërcime dhe Dardan Berisha me 19 pikë e dy kërcime.
Ndeshja e ardhshme e Kosovës do të jetë kundër Azerbajxhanit në udhëtim më 25 shkurt.
Në ndeshjen tjetër të grupit, Zvicra mundi Azerbajxhanin 72:53.
Kosova është në grup me Zvicrën, Irlandën dhe Azerbajxhanin.
Kosova me fitore nis parakualifikimet për Botëror / shkruan Gazeta Online Reporteri.net.
