![Pranohet kërkesa e ish-prokurores Antoneta Sevdari, vendimi i KPA-së do rishikohet në datën 17 prill Pranohet kërkesa e ish-prokurores Antoneta Sevdari, vendimi i KPA-së do rishikohet në datën 17 prill](https://www.vizionplus.tv/wp-content/uploads/2024/03/1670924706_AntonetaSevdar-1-752x440-1-684x400.jpg)
Është pranuar kërkesa e ish-prokurores Antoneta Sevdari, e cila kërkoi rishikim të vendimit të Komisionit të Posaçëm i Apelimit, që e shkarkoi nga detyra më 28 shkurt të vitit 2019.
Më datën 17 prill, ora 10:00 do të mbahet seanca gjyqësore për vazhdimin e gjykimit të çështjes në themel.
“Pranimi i kërkesës së kërkueses Antoneta Sevdari për rishikimin e vendimit të Kolegjit të Posaçëm të Apelimit (JR) nr. 6, datë 28.02.2019;
Prishja e vendimit të Kolegjit të Posaçëm të Apelimit (JR) nr. 6, datë 28.02.2019 dhe rigjykimi i çështjes gjyqësore të juridiksionit të rivlerësimit (JR) nr.17, datë 13.09.2018 që i përket ankimit të Komisionerit Publik kundër vendimit të Komisionit të Pavarur të Kualifikimit nr. 42, datë 18.07.2018.
Seanca gjyqësore publike për vazhdimin e gjykimit të çështjes në themel do të zhvillohet në datën 17.04.2024, ora 10:00”, thuhet në njoftim.
Rishikimi i vendimit të shkarkimit nga Komisioni i Posaçëm i Apelimit vjen pas vendimit të gjykatës së Strasburgut që i dha të drejtë ish prokurores.
Strasburgu dënoi Shqipërinë me dëmshpërblimin e ish prokurores me disa paga dhe sugjeroi të rishikohej vendimi i shkarkimit të saj pasi i janë shkelur disa të drejta gjatë rivlerësimit kalimtar.