Ka përfunduar mbledhja e Konferencës së Kryetarëve ku PS dhe Rithemelimi kanë rënë dakord për ngritjen e komisioneve hetimore të kërkuara nga demokratët. Vizion Plus mësoi se është rënë dakord për komisionet hetimore për TIMS dhe për koncensionet e dhëna në sektorin e Shëndetësisë.
Në lidhje me këto të dyja, është caktuar që Klotilda Bushka dhe Gazment Bardhi të bëjnë rishikimin e objektit të hetimit që më pas të vijojë procedurat normalisht.
Ajo që ka më shumë rëndësi për opozitën ka të bëjë me Reformën Zgjedhore, ku sipas përcaktimeve të Konferencës së Kryetarëve sot, Enkelejd Alibeaj do të jetë bashkëkryetar deri në fund të muajit mars, kur edhe mbaron mandati.
Më pas, diskutimet për reforman zgjedhore do të vijojnë mes PS dhe Rithemelimit, ku do të drejtohet nga dy bashkëkryetarët Damian Gjiknuri nga shumica parlamentare dhe Oerd Bylykbashi nga pakica.
E thënë ndryshe, PS dhe Rithemelimi kanë rënë dakord në parim që Kuvendi të ngrejë një “Nënkomision për Reformat”, që përbëhet nga 4 anëtarë, ku dy do të caktohen nga kreu i grupit të PS Blendi Çuçi dhe dy të tjerë nga Gazment Bardhi.
“Komisioni do përfundojë mandatin me një produkte që do të jetë i finalizuar. Produkti do ti nështrohet procedurave parlamentare në Kuvend. Produkti i komsionit zgjedhor do shqyrtohet në procedura parlamentare. Ne do të diskutojmë ndryshimet që kërkon opozita”, deklaroi Çuçi.
Qëndrimet e politikanëve
Pas përfundimit të mbledhjes së Konferencës së Kryetarëve të grupeve parlamenare nga PS dhe Rithemelimi, Bledi Çuçi doli në një prononcim për mediat, ku edhe tregoi çështjet ku u arrit dakordësia.
“Nuk kemi nën komision për çështje zgjedhore. Ramë dakord në parim të diskutojmë për çështje që kanë të bëjnë me ligje që kërkojnë 3/5 për tu miratuar. Ka mjaft ligje që duhen miratuar në urgjencë“, tha Çuçi.
Ndërsa kreu i grupit parlamentar të PD Gazment Bardhi ka thënë se ka pasur diskutime në parim dhe ende nuk janë mbyllur të gjitha çështjet. Bardhi theksoi se Parlamenti do të kthehet në normalitet kur të plotësohen të gjitha kërkesat e opozitës.
“Sot ka patur një diskutim dhe vendimmarrje në parim. Mos ta raportojmë si çështje të mbylllur. Kemi rënë dakord për ngritjen e komisionit hetimor për kontratat koncesionare në sektorin e shëndetësisë, për komisionin për ndërhyrjen e paligjshme për ndërhyrjet në të dhënat e sistemit TIMS. Kemi rënë dakord që çdo ligj që këkron 3/5 të diksutohet në një strukturë të posaçme që do të ngrihet në Kuvend në paritet të plotë mes grupit të PS dhe grupit të PD, me vendimmarrje që merren me konsensusin e të dyja palëve. Dua të vë theksin që për opozitën ka qenë gjithmonë gatishmëria për t’u rikthyer në normalitet në Kuvend, jemi të interesuar që Parlamenti të funksionojë në mënyrë normale, por që kjo të ndodhë duhet të përmbushen tre kërkesat e opozitës”, tha Bardhi.
“Fitoret” e opozitës
Rithemelimi arriti këtë të martë edhe dy “fitore” të tjera, atë të ngritjes së komisioneve hetimore. Nga 8 komisione që u kërkuan nga opozita, është dakordësuar që do të ngrihen dy të tilla, një për sistemin TIMS dhe një tjetër për koncensionet në shëndetësi.
Burime për Vizion Plus bëjnë me dije se nesër do të mblidhet sërish Konferenca e Kryetarëve që të miratojë ngritjen e komisioneve, pasi të rishikohet objekti.
Por kundër këtyre negociatave, ka reaguar edhe grupimi i PD-së së Lulzim Bashës. Enkelejd Alibeaj ka thënë se PS dhe Rithemelimi janë duke përgatitur marrëveshje okulte mes tyre në kurriz të shqiptarëve./vizionplus.tv
