Gabimet drejtshkrimore që janë identifikuar në vazhdimësi edhe në komunikimin zyrtar, kanë hapur rrugën që të mendohet për një projekt-ligj për mbrojtjen e gjuhës shqipe.
Nismëtarja Flutura Açka në një takim me studiues të fushës argumentoi se puna do të mbështetet në mendimin shkencor dhe janë disa çështje që mund të diskutohen.
“Fjala i takon shkencëtarëve nëse do të kenë nevojë për ndihmën e parlamentit. A duhet të vendosim provimin e gjuhës shqipe dhe të historisë së shqiptarëve për ata që marrin nënshtetësinë shqiptare? A do duhet të futim konceptin e humbur të redaktorit dhe korrektorit dhe të rivitalizojmë degën e mësuesisë shqipe, përpara se të mbyllet fare? A duhet të vendoset shqipja prioritet në të gjitha nivelet e arsimit? Të mbyllësh fjalën albanologjike, si mund ta bësh këtë?…”, tha kryetarja e Komisionit të Medias Flutura Açka.
Gjuhëtari Gjovalin Shkurtaj nënvizoi se mbrojtja e gjuhës është një punë që I takon të gjithëve.
“Ka ardhur koha të tregojmë më shumë kujdes për shqipen. Synim i përhershëm i njeriut është të folurit në gjuhën letrare, nuk është vetëm punë e gjuhëtarëve por edhe e shtetit dhe institucioneve arsimore. Të bëhen botime që i ndihmojnë gazetarët sikurse po e bën Gjermania për denglishten apo Franca për frëngjishten etj.”, tha Shkurtaj.
Gjuhëtarë dhe pedagogë që u bënë pjesë e këtij takimi në kryesinë e Kuvendit sollën në vëmendje edhe modelet që vijnë nga Franca, Italia, Suedia dhe Norvegjia sa i takon ligjit për mbrojtjen e gjuhës amtare./vizionplus.tv
