Ishte vetëm 5 vjeç, kur nëna e saj ndërroi jetë. Kjo ka bërë që Dafina Qela të ketë një lidhje shumë të ngushtë me babanë e saj. Ishte viti 2016 kur për Dafinën jeta mori një kthesë tjetër. Ajo pësoi një aksident dhe qëndroi dy muaj në koma. Mjekët nuk dhanë shumë shpresë, por sot është shëruar dhe është shndërruar në një model për gratë dhe vajzat.
Dafina tregon se sot ndihet shumë mirë dhe është e lumtur. E ftuar në “Vizioni i Pasdites” të moderuar nga Brikena Prifti, Qela thotë se jetë pa sprova nuk ka.
Qela: Arrij ta kujtoj nënën, e mbaj mend fizikun, flokun, jo më shumë. Por duke e parë në foto, kam krijuar disa kujtime me imagjinatë.
Thotë se motra e saj Donika i ngjason nënës, ndërsa Dafina ngjan me babain.
Qela: Babi është engjëll, nuk është njeri. Kam një raport të mrekullueshëm dhe kam fatin që kam një baba që të përkrah në çdo sferë të jetës.
Thotë se janë 4 fëmijë, por babai për shkak edhe të aksidentit, ka një raport pak më të ngushtë me Dafinën.
Qela: Kujtimi që nuk do ta harroj kurrë është kur ndodheshim në Shkup me tren. Unë nuk kisha udhëtuar kurrë me tren dhe nuk do ta harroj. Kemi kaluar shumë bukur. Vetëm unë dhe babi.
Dafina ka rrëfyer edhe aksidentin e rëndë që i ka ndodhur në vitin 2016.
Qela: Isha me motrën dhe tre shoqe. Na kishte ftuar një shoqe e cila do të këndonte në Ferizaj. Ishin tre makina, njëra na preu rrugën dhe të treja makinat u përplasën. Unë isha në gjendje më të rëndë, të tjerët mbetën të lënduar. Isha pasagjere në vend të parë dhe nuk kisha rripin e sigurimit. Gabim! Dua t’i them të gjithëve vendosni rripin e sigurisë sepse nuk dua të shoh dikë tjetër në vendin tim.
Më kujtohet ai moment, para se të bija në koma doja të dija a ishte motra mirë. Kur e dëgjova zërin e saj thashë paska shpëtuar. Nuk e di pse më erdhi ideja që të shpëtonte njëra. Kisha vështirësi sepse kisha lëndime shumë serioze në lëkurë, fytyrë. Por kisha guxim dhe vazhdova tutje. Nëse do të kujtoja përgjithmonë ato momente të këqija, vetëm do të shkatërroja veten. Kur isha në koma dëgjoja çdo gjë përreth, por nuk mund t’i flisja. Kur dola nga spitali ishte një fëmijë dhe i tha të ëmës “mami përbindëshi.” Kur kuptova që e kishte me mua shkova në shtëpi dhe qava. Nuk e shikoja dot veten në pasqyrë për 5 muaj.
Tregon se motra kishte lëndime të vogla. Dafina thotë se kanë një raport shumë të veçantë dhe ajo kujdeset shumë për të.
Qela: Ka ndenjur 24 orë me mua në spital. Më sillte edhe fruta deti në spital, imagjino në atë gjendje. Nga spitali më çonte në parukeri, se unë kam shumë qejf ta mbaj veten. Kur dilnim ashtu fshehur nga spitali, edhe më qahet edhe më qeshet.
Dafina është fëmija më i vogël në familje dhe tregon se e kanë llastuar shumë dhe vazhdojnë ta llastojnë. Pas aksidentit thotë se është bërë më e fortë./vizionplus.tv
