Partia Demokratike kërkon hetim ndërkombëtar për çështjen e 100 kontejnerëve me lëndë toksike të eksportuara nga Shqipëria.
Kreu i PD-së, Sali Berisha, në një deklaratë nga banesa e tij, ka theksuar se duhet një hetim i plotë për 2 anijet me lëndë të rrezikshme që janë nisur nga porti i Durrësit.
Sipas Berishës, figurat më të larta të qeverisë janë përfshirë në këtë çështje, ndaj do të ishte i nevojshëm një hetim nga strukturat e NATO-s dhe OKB-së.
“Një gjë është e sigurtë, se ato nuk janë ngarkuar kurrë pa dijeninë e plotë të autoritetit portal, Piro Vengut dhe Lubi Ballukut dhe Edi Ramës”, tha Berisha.
Sipas Berishës, vetëm përfshirja e vetë qeverisë në këtë çështje shpjegon pse as policia, as doganat, shërbimi sekret dhe autoriteti portual nuk kanë kryer detyrat e tyre në raport me 100 kontejnerët me mbetje toksike. Nga ana tjetër, Berisha deklaroi se çështja e 2 anijeve me mbetje toksike tregon se Shqipëria ka një problem të rëndë me sigurinë.
“Dëshmon se njëlloj sikundër eksportohen rreth 100 kontenierë me lëndë toksike, importohen dhjetëra, qindra kontenierë me drogë, helme, lëndë toksike, të cilat flitet se vijnë në Shqipëri për tu ç’aktivizuar dhe groposur”, deklaroi Berisha.
Çështja e kontejrerëve me këto mbetje ka gjetur jehonë edhe në disa media ndërkombëtare./vizionplus.tv
