![Edhe priftërinjtë luajnë futboll, mbahet në Shkodër kampionati europian, marrin pjesë 220 klerikë nga vendet e Europës Edhe priftërinjtë luajnë futboll, mbahet në Shkodër kampionati europian, marrin pjesë 220 klerikë nga vendet e Europës](https://www.vizionplus.tv/wp-content/uploads/2024/02/ff370010-8829-4e9c-bc81-b77e5cf6e1db-711x400.jpg)
Në Shkodër po zhvillohet për herë të parë një kompeticion i tejet i veçantë në minifutboll. Bëhet fjalë për kampionatin europian të përfaqësueseve të priftërinjve ku marrin pjesë 17 shtete.. Edicioni i 16-të i këtij aktiviteti u zgjodh të mbahej në qytetin simbol të harmonisë fetare në Shqipëri . Mirëseardhja, mbi 220 klerikëve ju urua përmes një meshe të mbajtur në katedralen e Shkodrës, pikërisht në këtë vend ku 57 vite më parë regjimi komunist me ndalimin e fesë e ktheu në pallat sporti.
Presidenti i federatës Shqiptare të Futbollit Armand Duka tha se kjo nuk është thjeshtë një garë futbolli.
Përpara nisjes së kompeticionit, pjesëmarrësit panë nga afër xhaminë Ebu Beker, muzeun Marubi dhe vendin e dëshmisë dhe kujtesës, duke u njohur me traditat dhe historinë e Shqipërisë.
“Jemi shumë të lumtur që gjendemi në Shkodër. Përfaqësoj kombëtaren e Austrisë të priftërinjve dhe këtë kampionat e kemi organizuar në vitin 2000 në Austri. Është hera e parë për mua në Shqipëri por sigurisht nuk do të jetë e fundit. Dëgjova për harmoninë fetare këtu në Shkodër dhe është shumë e rëndësishme që të ketë komunikim të mirë mes besimeve të ndryshme. Sa i përket kampionatit që po zhvillohet ndjehemi shumë mirë sepse sporti është i bukur dhe i bashkon njerëzit”, tha përfaqësuesi i kombëtares austriake të priftërinjve Johann Wurzer.
“Hera e parë në Shqipëri, një vend shumë i bukur. Jam i impresionuar nga vizita në xhami dhe harmonia fetare këtu. E kisha njohur vendin tuaj veç nga disa futbollist që luajnë në Rumani”, deklaroi kleriku nga Rumania Man Vasile Gabriel.
“Jemi një grup i ardhur nga Sllovakia. Jemi prej 13 vitesh pjesëmarrës në këtë kampionat dhe sot gjendemi në Shqipëri, e cila po na pëlqen shumë. Jemi të surprizuar nga bukuria e Shkodrës, një qytet europian. Pastaj harmonia fetare ishte një diçka e re dhe që sot më shumë se kurrë na duhet, pasi tek ne edhe të krishterët nuk jetojnë kaq në paqe. Shembull që do të duhet ta përhapim, dëshmi shumë e bukur”, u shpreh Peter Palovcik, klerik nga Slovakia.
Ndeshja e parë mes Shqipërisë e Kroacisë, përfundoi me fitoren e miqve me rezultatin 2-0. Kampionati do të zgjasë deri në 9 shkurt, ku do të shpallen fituesit dhe më pas vendi mikpritës i edicionit të 2025-es.