![Nuk bini dot nga pesha? Ky hormon mund të jetë arsyeja Nuk bini dot nga pesha? Ky hormon mund të jetë arsyeja](https://www.vizionplus.tv/wp-content/uploads/2024/06/ushqim.png)
Sa herë e keni pyetur veten: “Pse nuk mund të humbas peshë?” Ndoshta më shumë herë se sa do donit (ose shpresonit).
Dieta, stërvitja, mënyra e jetesës…ka shumë faktorë që ndikojnë në peshën ideale. Por, një faktor që duhet shtuar në listë është kortizoli, hormoni i stresit. Sigurisht që nuk është diçka që nuk dihet, fakti që stresi është i dëmshëm. Por përtej ndikimit të humorit tonë, kortizoli mund të jetë gjithashtu përgjegjës për shtimin e mundshëm të peshës.
Çfarë është kortizoli?
Kortizoli është hormoni kryesor i stresit, sipas klinikës Mayo. Rrit sheqerin në gjak, rrit përdorimin e glukozës nga truri dhe vë në dispozicion më shumë substanca riparuese të indeve.
“Kjo e lejon trupin tuaj të përdorë shpejt energjinë në situata stresuese, duke çuar në dëshirë më të shtuar për të ngrënë më shumë ushqim, pikërisht nga stresi,” thotë mjekja Charlotte Hodges.
I njohur zakonisht si hormoni i stresit, kortizoli luan një rol jetik në rregullimin e një game të gjerë funksionesh trupore, duke ndikuar në metabolizmin tuaj, sistemin imunitar dhe madje edhe në përgjigjen inflamatore.
Ky hormon, i prodhuar dhe i sekretuar sipas ritmit cirkadian të trupit, lirohet rreth 50-60% në mëngjes dhe më pas zvogëlohet gjatë pjesës tjetër të ditës. Pavarësisht nga koha, kur trupi e percepton stresin, gjëndrat mbiveshkore lëshojnë kortizolin në qarkullimin e gjakut, duke e përgatitur trupin për të përballuar “situatën e rrezikshme”.
Prodhimi i kortizolit çon në një fluks të vazhdueshëm të sheqernave në gjak. Kjo do të thotë që për sa kohë që sheqernat janë të disponueshme, trupi ynë nuk do të marrë energji nga indet dhjamore, por në vend të kësaj, ai do ta shndërrojë këtë sheqer të tepërt në një rezervë shtesë yndyre.
Si ndikon kortizoli në peshën ideale?
Prodhimi i këtij hormoni është një përgjigje normale ndaj një situate stresuese. Por kur kortizoli sekretohet dhe mbetet në qarkullim në sasi të larta në mënyrë kronike, atëherë fillojnë problemet. Ky hormon mund të ndikojë drejtpërdrejt në metabolizmin e karbohidrateve, proteinave dhe yndyrave në trup, duke çuar në rritjen e depozitimit të yndyrës, veçanërisht në zonën e barkut.