Iniciativa për vlerësimin e Ligjit për përdorimin e gjuhëve që do të shqyrtohet në Gjykatën kushtetuese në fillim të tetorit, u bë shkak për përplasje të reja mes Frontit Europian dhe koalicionit VLEN. Deputeti i BDI-së, Blerim Bexheti me kritika të ashpra për koalicionin qeveritar duke iu përgjigjur pyetjes nëse pret që gjykata ta anulojë ligjin me të cilin rregullohet përdorimi i gjuhës shqipe.
“Me këta hyzmeçarë, me këta vazalë, dhe me këtë qasje provokuese që bën ky koalicion qeveritar tani më është evidentet se gjithçka mund të pritet”, tha Blerim Bexheti nga Fronti Europian.
Nga ana tjetër, ministri nga radhët e VLEN, Orhan Murtezani në një intervistë televizive në Kanal 5 tha se gjykata kushtetuese me shumë gjasa ka parasysh se bëhet fjalë për iniciativë që është me karakter sigurie dhe politik.
“Nuk ka asnjë kuptim që përsëri të shqyrtohen zgjidhje ligjore të cilët paraprakisht me vite të tëra zbatohen me sukses”, tha Orhan Murtezani – Ministër për Çështje Europiane.
Murtezani, koalicioni i të cilit këtë iniciativë deri te gjykata kushtetuese e vlerësoi se përpjekje për grusht shteti, gishtin e drejtoi kah BDI-ja duke thënë se kjo iniciativë është objekt i destabilizimit.
“Në 2019 kur u dorëzua iniciativa, kryetar i Gjykatës kushtetuese ishte deputeti aktual nga radhët e koalicionit të udhëhequr nga BDI dhe e njëjta që nga 2019 ruhet në sirtarë ndërsa sot iu shërben agjendave të tyre për destabilizim”, shtoi ministri për Çështje Europiane, Orhan Murtezani.
Paraprakisht kryeministri Hristijan Mickoski theksoi se vendimi i gjykatës kushtetuese do të respektohet sido që të jetë ai, për shkak se, siç shtoi, nuk jetojmë në anarki./TV21/
Përplasje të reja mes BDI-së dhe VLEN-it për shqipen, Bexheti: Me këta hyzmeçarë, me këta vazalë gjithçka është e mundur appeared first on Telegrafi.
