Kolltukët e ministrave të OBRM-PDUKM-së në Qeverinë teknike mund të mbeten të zbrazëta. LSDM-ja sot edhe një herë ka bërë me dije se nuk do t’i votojë propozimet e partisë së Mickoskit për ministra në kabinetin e Talat Xhaferit, nëse deputetët opozitarë nuk mbështesin Qeverinë teknike.
“Nëse OBRM-PDUKM-ja nuk voton për qeverinë teknike dhe nuk i mbështet propozimet e veta për qeverinë teknike, atëherë edhe deputetët e LSDM-së nuk kanë përse t’i votojnë. Në këtë rast, vendet e DPMNE-së në Qeverinë teknike duhet të mbeten vakante, kurse mandatari duhet të propozojë Qeveri në të cilën ato gjashtë vende duhet të mbeten të paplotësuara. DPMNE-ja, në përputhje me ligjin, si të gjitha partitë e tjera që kanë ministra në qeverinë teknike, duhet t’i propozojë kandidatët e vet dhe të votojë për atë qeveri”, thonë nga LSDM.
Me qëndrim më të ashpër kundër OBRM-PDUKM-së ka dalë sot Partia Liberal Demokratike. Nga ky subjekt e cilësojnë si të papërgjegjshme sjelljen e partisë së Mickoskit duke e akuzuar se po e rrezikon votimin e qeverisë teknike.
Por, OBRM-PDUKM-ja, e cila njoftoi se do të propozojë ministra për qeverinë teknike mbetet në qëndrimin se nuk do të votojë “pro” qeverisë së Xhaferit. Partia e Mickoskit thotë se është pushteti ai që mund ta rrezikojë procesin zgjedhor, duke mos i votuar kandidatët e opozitës për ministra.
“Mbetemi në qëndrimin se nuk do ta votojmë përbërjen e qeverisë, kurse LSD-së i mbetet të vendosë nëse do t’i respektojë ligjet ose do t’i shkelë të njëjtit, me çka i shpalos qëllimet për rrezikimin e procesit zgjedhor. OBRM-PDUKM-ja do t’i propozojë ministrat dhe zv/ministrat në përputhje me ligjin për qeverinë teknike, por nuk do ta votojë kryeministrin teknik të BDI-së, Talat Xhaferin. Ligji nuk njeh propozime për ministra me “vende vakante”, Qeveria nuk votohet individualisht, por në tërësi”, thonë nga OBRM-PDUKM.
Ditë më parë, edhe partia e Ahemtit, njoftoi se deputetët e saj nuk do të mbështesin propozimet e OBRM-PDUKM-së për ministra nëse opozita maqedonase nuk voton qeverinë teknike dhe Talat Xhaferin kryeministër teknik.
Përgatitjet formale në Kuvend për Qeverinë teknike duhet të nisin të hënën, më 22 janar, ndërsa qeveria teknike pritet të votohet më 28 janar./Alsat/
Partitë në Maqedoni përplasen për Qeverinë teknike appeared first on Telegrafi.
