Kryeministri i RMV-së Hristijan Mickoski, ka folur për gazifikimin e vendit, si dhe metodat e ngrohjes së qytetarëve. Mickoski tha se e vetmja mënyrë për të vepruar menjëherë është në ato ambiente ku përdoren dru apo mjete të tjera ngrohëse, kryesisht mbetje druri, shpesh goma.
“Ata shfrytëzues nuk janë fajtorë, thjesht gjendja sociale është e tillë që detyrohen ta përdorin, qoftë të zëvendësohet me një burim tjetër energjie që është e pranueshme për ta, e ajo është ngrohja qendrore”.
“Si do të arrijmë deri te ngrohja qendrore në mënyrë më të lirë, përmes ndërtimit të centraleve të gazit me kogjenerim, të cilat gjatë dimrit kur kemi nevojë do të prodhojnë edhe energji elektrike dhe njëkohësisht do të prodhojnë ujë të nxehtë, i cili do të shpërndahet përmes tubacioneve të nxehtësisë në ato mjedise që sot përdorin një burim energjie krejtësisht të ndryshëm, i cili fatkeqësisht lëshon në ajër grimca PM2.5 dhe PM10. Dhe ky është 60 për qind e faktorit që ndikon në ndotjen”.
“Jemi duke punuar në disa projekte të tilla. Pikërisht prej këtu po shkoj në një takim në Qeveri me një investitor potencial i cili dëshiron të investojë një miliard euro në këtë lloj kapaciteti prodhues. Nuk do të jetë sipas parimit si më parë, siç ishte ai ligji i posaçëm, projekti strategjik në Parlament, që Qeveria e kaluar e dorëzoi me çmime të privilegjuara etj. Gjithçka do të jetë sipas kushteve të tregut. Negociatat janë me investitorët, në të cilat qëllimi im është që shteti të jetë pjesë e pakos, të jetë bashkëpronar në vetë atë investim, normalisht jo me para, me tokë, me lidhje e të ngjashme”, tha Mickoski.
“Sepse ne vlerësojmë që investitorët privatë që kanë qasje në këtë burim, siç është gazi, mund ta sjellin në një mënyrë shumë më të thjeshtë dhe më fleksibile sesa shteti. Kështu do të shohim se si do të përfundojnë këto negociata”.
Dhe nëse gjithçka shkon mirë, ky proces nuk do të ndodhë brenda natës. Por do të fillojmë, me Zotin përpara, gjatë vitit të ardhshëm. Pres që në një periudhë deri në tre vjet të përfundojë e gjithë kjo”, theksoi Mickoski, duke iu përgjigjur pyetjes së gazetarëve lidhur me ndërtimin e termocentraleve me gaz, që do të ndikojë edhe në uljen e ndotjes së ajrit.
Mickoski: Jemi duke negociuar me investitorët për një mënyrë më të thjeshtë dhe më fleksibile për të sjellë gaz në vend appeared first on Telegrafi.
