![Ish-pjesëtari i UÇK-së arrestohet nga policia serbe, po udhëtonte me vëllanë drejt Italisë Ish-pjesëtari i UÇK-së arrestohet nga policia serbe, po udhëtonte me vëllanë drejt Italisë](https://www.vizionplus.tv/wp-content/uploads/2024/01/417453237_1749212285578123_2459988278355424549_n-e1704477014304-1-599x400.jpg)
Avokati Xhevdet Smakiqi ka njoftuar se ish-ushtari i Ushtrisë Çlirimtare të Kosovës, Hasan Dakaj, është arrestuar nga policia serbe në Merdarë rreth orës 09:00 të mëngjesit teksa ishte duke udhëtuar me vëllanë e tij drejt Italisë.
Smakiqi tha se është autorizuar nga familja Dakaj që të mbrojë të drejtat ligjore të familjarit të tyre. Ai shtoi se familjarët janë të frikësuar pasi ish-ushtari i UÇK-së është dërguar në qendrën e ndalimit në Kurshumli “dhe mund t’i nënshtrohet torturave fizike e psikike apo edhe më keq”.
“Unë menjëherë do të ndërmarr veprime duke ushtruar kërkesë pranë MPJD-së që të interesohet për fatin e shtetasit të Kosovës, Hasan Dakaj, i arrestuar sot në mëngjes në Merdarë nga polica serbe vetëm sepse ka qenë ish-pjesëtar i UÇK-së”.
“Si avokat i familjes Dakaj i bëjë thirrje urgjente MPJD-së që përmes kanaleve diplomatike të kërkojë lirimin e Hasan Dakajt dhe t’i lejohet lëvizja e lirë sikurse çdo shtetasi të Kosovës, pa diskriminimin”, shkroi Smakiqi.
Ai i bëri thirrje Serbisë që ta ndalë persekutimin e shtetasve të Kosovës, duke thënë se Serbia po e shkel lirinë fundamentale të lëvizjes së lirë, me fokus të ish-pjesëtarëve të UÇK-së./vizionplus.tv