Greqi – Një 19 vjeçar ka gjetur vdekjen në një park argëtimi në Halkidiki.
Të afërmit e tij kërkojnë drejtësi dhe përgjegjësit e aksidentit.
I riu ishte për vizitë me nënën dhe dy vëllezërit e tij në Halkidiki dhe u ngjit në një karusel pa e ditur se çfarë e priste.
Sipas rezultateve të ekspertizës mjeko-ligjore, 19-vjeçari ka gjetur vdekjen e menjëhershme nga rënia.
Karrigia plastike në të cilën ai ishte ulur u shkëput dhe 19-vjeçari ra nga karuseli, siç tha i shokuar vëllai i tij, i cili në atë moment ndodhej në sediljen tjetër dhe pa tragjedinë të shpalosej para syve të tij.
19-vjeçari mori plagë të rënda në qafë dhe kokë.
Pronari i parkut u arrestua menjëherë, ndërsa operatori i makinerive është larguar menjëherë nga vendi i ngjarjes dhe është shpallur në kërkim nga autoritetet.
Një hetim paraprak po kryhet nga policia. Do të kryhet ekspertiza për zbardhjen e plotë të shkaqeve të aksidentit, ndërsa vendngjarja mbetet e bllokuar nga policia.
