Presidenti francez Emmanuel Macron tha se dërgimi i trupave perëndimore për të luftuar në Ukrainë nuk mund të përjashtohet dhe se Parisi do të heqë dorë nga kundërshtimi i tij i gjatë për blerjen e furnizimeve urgjente të artilerisë për Ukrainën nga jashtë BE-së.
Duke argumentuar se humbja e Rusisë ishte e nevojshme për të garantuar sigurinë kolektive të Evropës, Macron tha se një takim i 25 liderëve evropianë në Paris të hënën kishte rinovuar vendosmërinë e Perëndimit për të ndihmuar Ukrainën, pas më shumë se dy vjetësh lufte.
“Ne do të bëjmë gjithçka që duhet për të parandaluar që Rusia të fitojë luftën”, u tha ai gazetarëve. I pyetur nëse dërgimi i trupave perëndimore në Ukrainë ishte një opsion, Macron tha se çështja ishte diskutuar në konferencë.
“Nuk ka asnjë konsensus sot për dërgimin e trupave zyrtare në terren. Por përsa i përket opsioneve, asgjë nuk mund të përjashtohet”, shtoi ai, pa elaboruar se cilat vende po shqyrtonin një hap të tillë.
Macron tha se liderët ranë dakord të krijonin një “koalicion” vendesh që do të diskutonin t’i siguronin Ukrainës raketa dhe bomba me rreze të gjatë veprimi. Franca dhe Mbretëria e Bashkuar dhuruan disa raketa Storm Shadow dhe Scalp vitin e kaluar dhe koalicione të ngjashme janë formuar tashmë për artilerinë, mbrojtjen ajrore dhe luftën detare.
Qëndrimi më agresiv pason thirrjet e Ukrainës për rritjen e mbështetjes perëndimore për të frenuar një breshëri në rritje të sulmeve ruse që kanë parë Moskën të fitojë terren në lindje të vendit pas muajsh ngërçi në fushën e betejës.
Vendet evropiane janë gjithashtu gjithnjë e më të shqetësuara se kthimi i mundshëm i ish-presidentit amerikan Donald Trump në Shtëpinë e Bardhë mund të çojë në një reduktim të mbështetjes së Uashingtonit për Ukrainën dhe një dobësim të paktit të mbrojtjes së Amerikës me Evropën.
Ekziston gjithashtu një ndjenjë në kryeqytetet evropiane se Rusia përbën një kërcënim më të gjerë, jo vetëm në Ukrainë, dhe madje mund të pushtojë vendet anëtare të NATO-s në Evropën Lindore. Macron i shprehu këto shqetësime në Konferencën e Parisit ku morën pjesë kancelari gjerman Olaf Scholz, kryeministri holandez Mark Rutte dhe liderja estoneze Kaja Kallas, ndër të tjera.
“Kam vënë re se thuajse të gjitha vendet e përfaqësuara rreth kësaj tavoline kanë thënë. . . se konsensusi i përbashkët është që ne duhet të jemi gati brenda disa vitesh për një sulm rus ndaj këtyre vendeve”, tha Macron. /vizionplus.tv
