Policia britanike njoftoi sot se një burrë u arrestua pasi një automjet u përplas në portat e Pallatit Buckingham në zemër të Londrës.
Imazhet e paqarta të postuara në rrjetet sociale tregojnë një makinë në portat e përparme të pallatit. Mediat britanike raportuan deklaratat e një dëshmitari okular, i cili tha se dëgjoi “një zhurmë të madhe”.
Policia njoftoi se ngjarja ka ndodhur në orët e para të mëngjesit të së shtunës.
“Oficerët e armatosur arrestuan një person në vendngjarje me akuzën e dëmtimit të pronës së tjetrit. Ai u dërgua në spital. Nuk ka raportime për të lënduar”, tha policia e Londrës në një deklaratë. “Hetimet po vazhdojnë për të përcaktuar rrethanat”.
Pallati Buckingham tha se asnjë anëtar i familjes mbretërore nuk ishte brenda pallatit në kohën e incidentit dhe se po punohej për të riparuar dëmtimet në portat.
