Ndërsa lufta në Gaza vazhdon, Izraeli po përgatitet gjithashtu për skenarë që mund të lindin në zona të tjera, tha të enjten kryeministri Benjamin Netanyahu, mes shqetësimeve për një sulm të mundshëm iranian si hakmarrje për vdekjen e zyrtarëve të lartë iranianë.
“Kushdo që na bën keq, ne do të hakmerremi. Ne jemi të përgatitur të plotësojmë të gjitha nevojat e sigurisë së shtetit të Izraelit, si në mbrojtje ashtu edhe në sulm”, tha ai në një deklaratë pas një vizite në bazën ajrore Tel Nof në Izraelin jugor.
Izraeli po përgatitet për një hakmarrje të mundshme iraniane pas vrasjes së një gjenerali të lartë dhe gjashtë oficerëve të tjerë iranianë në një sulm ajror në kompleksin e ambasadës iraniane në Damask më 1 prill.
אנחנו מוכנים בהגנה ובהתקפה >> pic.twitter.com/fkkQcQzLya
— Benjamin Netanyahu – בנימין נתניהו (@netanyahu) April 11, 2024
Izraeli nuk ka marrë përgjegjësinë për këtë sulm. Megjithatë, dje, udhëheqësi suprem i Iranit, Ayatollah Ali Khamenei, tha se Izraeli “duhet të ndëshkohet dhe do të dënohet” për sulmin.
Deklaratat e Netanyahut erdhën sot pasi trupat izraelite dhe avionët luftarakë nisën një operacion gjatë natës në Gazën qendrore. Sipas ushtrisë, qëllimi ishte shkatërrimi i infrastrukturës së grupeve të armatosura palestineze.
Shumica e trupave izraelite janë tërhequr nga Gaza në përgatitje për një sulm në qytetin jugor të Gazës, Rafah, ku më shumë se një milion palestinezë janë zhvendosur, ndërsa luftimet janë në pjesë të ndryshme të enklavës./vizionplus.tv
