Në Rripin e Gazës, i cili po përjeton një krizë humanitare të përmasave gjithnjë e më të mëdha, bombardimet intensive ajrore vazhdojnë si pjesë e operacioneve të Izraelit kundër Hamasit, pa asnjë perspektivë as për një armëpushim të përkohshëm, pasi sot fillon Ramazani, muaji i shenjtë për myslimanët.
Popullsia e enklavës, e sprovuar gjithnjë e më rëndë nga uria, është e dëshpëruar për ushqim.
Një anije e ngarkuar me 200 tonë ndihma, e marrë me qira nga OJQ-ja spanjolle Open Arms, pritej të nisej të dielën nga Qiproja për në enklavën palestineze, por nisja e saj nuk është konfirmuar.
Dje banorët shkuan në plazh në pjesën jugore të Rripit të Gazës me shpresën se do të shihnin mbërritjen e ndihmës.
“Kam pritur që në mëngjes pasi nesër fillon muaji i shenjtë i Ramazanit dhe situata është tragjike”, tha njëri prej tyre, Mohammed Harara.
Jordania, Shtetet e Bashkuara, Franca, Belgjika dhe Egjipti morën pjesë dje në dërgimin e ndihmave humanitare në Rripin e Gazës. Por OKB-ja, e cila po paralajmëron kundër”urisë së përhapur pothuajse të pashmangshme në enklavë, thekson se fluturimet ajrore dhe transporti detar nuk mund të zëvendësojnë rrugët tokësore.
Pavarësisht bisedimeve të reja në fillim të marsit në Kajro, vendet që po ndërmjetësojnë – Katari, Egjipti, SHBA – nuk kanë arritur të arrijnë një marrëveshje për të shpallur një armëpushim përpara se të fillojë Ramazani sot. /vizionplus.tv
