![FOTO/ E ekzekutua mbrëmë, biznesmeni grek jetonte brenda një “fortese” FOTO/ E ekzekutua mbrëmë, biznesmeni grek jetonte brenda një “fortese”](https://www.vizionplus.tv/wp-content/uploads/2024/02/Capture-20-692x400.png)
Kristos Jalias është biznesmeni i njohur në tregtinë e mishit dhe bojrave që u ekzekutua me kallashnikov në Greqi, brenda në makinë, të cilës më pas iu vu zjarri nga autorët për të humbur çdo gjurmë.
Mediat greke kanë publikuar sëfundmi shtëpinë luksoze të biznesmenit, e cila është një rezidencë e madhe, që në përbërje të saj ka një vilë luksoze dhe hektarë të tëra kopshte e prona.
Shtëpia i ngjan një “kalaje”, pasi, përtej gardhit të lartë prej guri, në çdo cep të parcelës ka kamera sigurie, të cilat regjistrojnë çdo lëvizje brenda pronës si dhe rreth saj.
Rezidenca luksoze ndodhej në periferi dhe rruga e vetme që të çonte drejt saj ishte permes një pylli.
Sipas informacioneve nga mediat greke, bëhet e ditur se vitet e fundit Kristos Jalias e ndante kohën mes pallatit luksoz dhe një shtëpie që kishte blerë pranë vendbanimit Mandra.
Ai u ekzekutua ditën e djeshme me breshëri kallashnikovi, ku sipas hetuesve, 20 plumba që janë derdhur ndaj tij i kanë marrë jetën. Më pas, autorët i kanë vënë flakën mjetit me të cilin lëvizte viktima dhe armën që përdorën në krim, duke u munduar të humbisnin çdo lloj gjurme.
Policia tha se dy janë pistat e hetimit. Ajo e larjes së hesapeve mes bandave të kontrabandës së cigareve që operojnë në zonën e Elefsine ose pista e prishjes së bizneseve me partnerët e tij shqiptare në bizneset që ai kryente me vendin tonë. Viktima ka qenë ortak jo zyrtar me Thimio Dobroniku, një shtetas shqiptar i ekzekutuar pak muaj më parë në Faliro të Athinës./vizionplus.tv