Presidenti turk Rexhep Tajip Erdogan foli me kritika ndaj Bashkimit Evropian në mesazhin e tij dërguar bllokur me rastin e Ditës së Evropës.
Në mesazhin e tij, presidenti turk tha se “politikat e zbatuara nga disa institucione dhe vende evropiane” gjatë luftës në Gaza “kanë lëkundur besimin në vlerat evropiane”.
“Për sa kohë që krizat, konfliktet dhe luftërat që prekin Evropën dhe gjeografinë tonë të përbashkët mbeten të pazgjidhura, vënia në pikëpyetje e këtyre vlerave nuk do të ndalojë së intensifikuari”, paralajmëron Recep Tayyip Erdoğan.
“Shumë probleme si luftërat, konfliktet, aktet e terrorizmit, migrimi i parregullt dhe ndryshimet klimatike kërcënojnë rendin në kontinentin evropian”, tha presidenti i Turqisë.
Ai foli për diskriminimin dhe krimet e urrejtjes kundër komunitetit turk.
Duke denoncuar “rritje të islamofobisë, ksenofobisë dhe racizmit në kontinent, të cilat janë një nga burimet më të mëdha të shqetësimit për qytetarët dhe emigrantët që jetojnë në Evropë”, ai këmbëngul në “trajtimin diskriminues dhe krimet e urrejtjes kundër komunitetit turk në Evropë që janë kryer në mënyrë sistematike”.
Erdogan thotë se ka ardhur koha për të “zhvilluar bashkëpunimin e tyre në të gjitha fushat si dhe në fushën e negociatave të anëtarësimit”.
Turqia ka qenë zyrtarisht një vend kandidat për anëtarësim në Bashkimin Evropian që nga viti 1999, por negociatat janë ngrirë që nga viti 2018.
“Përballë politikave të përjashtimit ndaj vendit tonë, Turqia nuk do të përmbahet nga përdorimi dhe zhvillimi i mundësive dhe aftësive të saj strategjike”, paralajmëroi presidenti turk në mesazhin e tij./vizionplus.tv
