BRUKSEL-NATO njoftoi të mërkurën se do të ndihmojë në blerjen e deri në 1000 raketa Patriot në mënyrë që aleatët të mund të mbrojnë më mirë territorin e tyre ndërsa Rusia shton sulmet e saj ajrore në Ukrainë.
Agjencia për Mbështetjen dhe Prokurimin e NATO-s tha se do të mbështesë një grup kombesh, duke përfshirë Gjermaninë, Holandën, Rumaninë dhe Spanjën, në blerjen e Patriotëve, të cilët përdoren për t’u mbrojtur kundër raketave lundruese dhe balistike, si dhe avionëve armiq.
Sipas burimeve të industrisë, kontrata mund të jetë rreth 5.5 miliardë dollarë.
Agjencia tha se “kombet e tjera përdoruese pritet të përfitojnë nga kushtet e kontratës”, pa dhënë detaje.
“Sulmet me raketa dhe drone ruse ndaj civilëve, qyteteve dhe qytezave të Ukrainës tregojnë se sa e rëndësishme është mbrojtja ajrore moderne”, tha në një deklaratë Sekretari i Përgjithshëm i NATO-s, Jens Stoltenberg.
“Rritja e prodhimit të municioneve është thelbësore për sigurinë e Ukrainës dhe për tonën.”
Si një organizatë, NATO ofron vetëm mbështetje jo vdekjeprurëse për Ukrainën, por anëtarët e saj dërgojnë armë dhe municione individualisht ose në grup./vizionplus.tv
