Të paktën 10 plumba u zbrasën mbrëmjen e së enjtes ndaj Selami Brahimit, 60-vjeçari që i shpëtoi mrekullisht vdekjes. Sapo kishte zbritur mbesën e mitur, 60-vjeçari po futej në automjet, ku një breshëri plumbash e la të plagosur. Menjëherë pas të shtënave, autori/ët u larguan, duke i shpëtuar arrestimit nga uniformat blu.
Policia njoftoi se ka sekuestruar kamerat e zonës ku ndodhi atentati dhe po vijon kërkimet për lokalizimin e autorëve. Ndërkohë uniformat blu kanë marrë dëshmitë e personave të pranishëm në vendngjarje si dhe të vetë të plagosurit. Ky i fundit ka mohuar të ketë konflikte me ndokënd, ndërsa ka nënvizuar se nuk ka mundur të dallojë automjetin dhe autorët, kjo për shkak të dinamikës së ngjarjes.
“Unë sapo lashë mbesën time tek një punonjës që është afër picerisë. Sapo jam ulur poshtë më kanë qëlluar. Kam shpëtuar për mrekulli sepse në atë moment jam kthyer dhe plumbi më kapi fytyrën sepse ndryshe mund të më kishin qëlluar në kokë. Nuk kam arritur që të shoh asgjë. Nuk kam asnjë problem me askënd dhe nuk e di kush mund të jenë autorët. Po ashtu nuk kam arritur që të shoh asnjë makinë apo mjet tjetër të autorëve. Nuk kam pasur asnjë kërcënim apo problem ndaj nuk e kam idenë se kush më ka qëlluar dhe për çfarë arsye”, mësohet të ketë thënë i plagosuri.
Ndërkohë, këtë të premte uniformat blu njoftuan arrestimin e bujshëm të një nga emrave më të njohur të drejtësisë, Shkëlzen Xhenje. Ky i fundit rezulton të jetë një person me precedent të theksuar kriminal, i dyshuar si pjesëmarrës edhe në atentatit e mbrëmjes së djeshme ndaj Selami Brahimit, në hyrje të Shkodrës.
Shkëlzen Xhenje rezulton si i dyshuar edhe për një tjetër atentat të bujshëm në Shkodër. Vrasja e Ismet Çekores në gusht të vitit 2022, tronditi Shkodrën, duke ‘trazuar’ edhe njëherë botën e krimit dhe gjakmarrjes në këtë zonë.
Ismet Çekorja u ekzekutua me breshëri plumbash, pasi dyshohet se u nxor në pritë nga një 19-vjeçar, i cili u ekzekutua disa kohë më pas nga i biri i viktimës, Bajram Çekorja. Ky i fundit është shpallur në kërkim, si autor i dyshuar i atentati të dyshuar ndaj Alban Bruçit të ndodhur në 25 gusht. Ndonëse në kërkim “hija” e tij u shfaq për të marrë hak ndaj vrasjes të të atit, i cili sipas informacioneve u nxor në pritë nga 19-vjeçari, Erjon Xhenje. I riu u vra teksa ndodhej në një lokal, në lagjen “Kiras”. Autori u afrua me motoçikletë, zbrasi plumbat dhe u largua për të mos u kapur nga uniformat blu.
Shkëlzen Xhenje dyshohet të jetë autor i atentatit ndaj babai të Bajram Çekores, teksa ai u shpall në kërkim pasi doli në regjistrimet e dosjes “Metamorfoza”. 32-vjeçari me precendet të theksuar kriminal dhe i përshkruar nga autoritetet si person me rrezikshmëri të lartë rezulton të jetë “krahu i djathtë” i një tjetër emri mjaft të njohur në botën e krimit, Eljo Hato./vizionplus.tv/
