Gjatë muajit mars si sëmundje më e shpeshtë akute infektive ka qenë lija e dhenve me gjithsej 309 raste. Në krahasim me muajin e kaluar të shkurtit, numri i rasteve të raportuara me linë e dhenve shënon rënie prej 15,6 për qind, ndërsa në krahasim me muajin mars 2024 ka rënie prej 62,5 për qind, theksohet në raportin më të ri të Institutit të Shëndetit Publik (ISHP).
“Gjatë muajit mars të vitit 2025 në Republikën e Maqedonisë së Veriut janë raportuar gjithsej 608 raste të personave të infektuar me sëmundje akute infektive – duke përjashtuar Kovid-19, gripin, tuberkulozin, AIDS, AFP dhe bartës kronikë të hepatitit B dhe C dhe HIV, me një incidencë totale prej 33,1 për 100.000 banorë. Gjatë muajit mars ka pasur një rënie të numrit të përgjithshëm të të infektuarve me 18,5 për qind krahasuar me muajin e kaluar të shkurtit të vitit 2025. Krahasuar me mars 2024 ka rënie prej 57,5 për qind, si dhe krahasuar me mesataren aritmetike për periudhën 2015–2024 me 44,2 për qind”, sqarohet në raportin e Institutit.
Sa i përket ndarjes sipas grupeve të sëmundjeve infektive akute në muajin mars, numri më i madh i përket sëmundjeve tjera. Nga këto, numri dhe incidenca më e madhe u raportua për linë e dhenve. Në këtë grup janë raportuar, 19 raste me mononukleozë infektive, tetë raste me skarlatinë, tre raste me infeksione pneumokokale dhe nga një rast me kollë të mirë, sëmundje legjionare dhe sëmundje meningokokale.
Në muajin mars, janë raportuar 195 raste të sëmundjeve të zorrëve. Nga këto, numri dhe incidenca më e madhe raportohet për enterokolitin. Janë raportuar 10 raste të salmonelozës, tetë raste të infeksioneve dhe intoksikimeve bakteriale nga ushqimi dhe një rast me kampilobakteriozë.
Në grupin e sëmundjeve të tjera infektive akute, në muajin mars janë regjistruar 58 raste. Prej tyre, 54 janë raste me zgjebe, tre raste me meningjit bakterial dhe një me virus meningoencefalit.
Në grupin e infeksioneve seksuale dhe të transmetuara nga gjaku – duke përjashtuar HIV/AIDS, janë regjistruar 11 persona të infektuar – janë raportuar katër raste me hepatit B viral, tre raste me sifilis, dy raste me infeksion klamidia dhe nga një rast me hepatit C dhe gonorresë.
Lija e dhenve në RMV, ISHP: Në muajin mars janë raportuar 309 raste appeared first on Telegrafi.
