Presidenti rus Vladimir Putin mbërriti sonte në Çeçeni, Republika Ruse e Kaukazit e udhqëhequr nga aleati i tij i ngushtë, Ramzan Kadyrov.
Kjo është vizita e parë e Putinit në Çeçeni që nga viti 2011.
Kadyrov ka njoftuar ardhjen e presidentit rus në një postim në Telegram.
“Në kuadër të kësaj vizite është planifikuar një program i pasur”, tha ai.
Televizioni publik rus shfaqi pamjet e Putinit duke mbërritur me helikopter. Kadyrov dhe bashkëpunëtorët e tij të ngushtë e pritën atë në aeroport.
“Njerëzit do të jenë të lumtur. Ata do të jenë të lumtur që presidenti erdhi në Republikë. Për ne është një motivim, është rinovim. Është një lumturi e madhe”, u tha gazetarëve udhëheqësi çeçen.
Sipas Kadyrov, ndalesa e parë e Putinit ishte varri i Akhmat Kadyrov, babait të tij dhe paraardhësit në udhëheqjen e Çeçenisë, i cili u vra në një sulm nga rebelët islamikë në vitin 2004.
Më herët sot, Putin vizitoi Beslanin, Osetinë e Veriut, për të shënuar 20 vjetorin e një sulmi vdekjeprurës nga islamistët çeçenë në një shkollë fillore.
Çeçenia drejtohet që nga viti 2007 nga Ramzan Kadyrov, forcat e të cilit shpesh akuzohen për shkelje të të drejtave të njeriut.
Vizita e Putinit vjen ndërsa operacionet ushtarake ukrainase vazhdojnë në rajonin Kursk të Rusisë, ku ukrainasit arritën të kapnin dhjetëra komunitete pas një sulmi të befasishëm më 6 gusht.
Forcat çeçene janë vendosur gjithashtu në rajonin e Kurskut për të zmbrapsur këtë sulm./vizionplus.tv
